Saturday, April 11, 2009

حلوه الحياه


اما تصحا الصبح تلاقى نفسك متلبس بتهمه الابتسام كده منغير سبب واضح

تفتح عينك تشوف نور الصبح اجمل.. اشعه الشمس خصل شعر ذهبى عايز تلمسها ايديك

تزيد ابتسامتك و تحس انك قايم من فوق السرير خفيف و كأن طلعلك جناحات بترفعك لفوووق

عينك فى الشارع بتلقط عيون الاطفال المبتسمه و لعبهم البرئ ..

و مع انك فى وسط زحام عربيات الصبح و ملل الانتظار إلا انك سامع فى ودنك نغم بينسجه خيالك

و رغم سكون جسمك فى المكان بس روحك بترقص جواك رقصة طفل شقى ميعرفش اى حركات غير التنطيط ..

شفايفك لسه بتبتسم وسط بصات الناس المتشككه فى سلامتك العقليه و تفضل كده طول يومك العادى جدا و لغاية ما ترجع سريرك

و انت بتحط دماغك على المخده تتمنى بكره يتولد من جديد جواك نفس الاحساس

:)

Monday, May 12, 2008

اشياء صغيره


فى شهر مارس من كل عام فقط فى هذا الشهر تغزو المكان بلونها المضئ ...تلك الزهيرات الصفراء تغزونى معه ..تغزو قلبى و تملأه بهجه ..متناثره على حافتى شريط الترام طوااال الطريق.. تختار ان تتزاحم فى مكان و تقل فى اخر لا اعلم لماذا... ربما تشعر باحتياج اهل هذا المكان للبهجه ربما تعلم انهم لا يستطيعون رؤية زهره واحده وحيده ربما همومهم الصغيره الكبيره تعمى اعينهم عنها

كم هى قويه تلك الصغيره كيف تستطيع ان تحيا فى تلك الارض الملوثه بزيوت و شحوم الترام كيف تستطيع بلونها الصافى ان تغير طبيعة تلك الارض

مازلت انتظرها كل عام ..اعلم عندما تأتى ان يوم ميلادى قريب .. احتفل به ..بها ..و هى فى قمة بهائها

اذكر تلك المره التى استسلمت فيها لغواية امتلاكها (واحده بين اوراقى فقط لن تضر )هكذا اقنعت نفسى لن ابالى بمن حولى لن يكون منظر غريب جدا اذا ما نزلت من على رصيف المحطه ووقفت بين القضبات انتقى واحده اخذها معى ..كانو ينظرون الى كأننى افعل شئ عجيب ..يظنون انى وجدت شيئا ثمينا بين القضبان سقطت من احدهن ..مصمصت احدى السيدات شفاها عندما اكتشفت ان هذا الشئ الثمين تلك الزهره البريه ، حاولت ان اخفيها فى قبضتى و انا اخشى على اوراقها الرقيقه احاول جاهده ان احتويها دون ايذائها لكن دون جدوى، ذبلت بمجرد ملامستى لها

اشياء صغيره مثلها تجعل الحياه فى عينى اجمل لكنى لا استطيع الاحتفاظ بهذا الاحساس كما انى لا استطيع الاحتفاظ بها

Thursday, April 24, 2008

لمن يهمه الامر

أوقات بيكون حولينا ناس كتير و أحداث كتير المفروض إنها كبيره و مؤثره فى مجريات حياتنا (خطوبه ،جواز، شغل جديد و لا نجاح فى دراسه ) لكن تحس انها متهمكش ..مش حسسها ..كأنها بتحصل لحد تانى غيرك كأنك فى غيبوبه كامله .انقطاع تام عن العالم الخارجى و كأن ردود افعالك مبرمجه سابقا و كأن الحد اللى بيتصرف بره ده شخص و انت الحقيقى محبوس جواه.... انا اغلب الوقت بحس بكده
بحاول اخرج الحقيقى ده هنا يمكن يلاقى لنفسه سكة هروب او يمكن يتصالح مع الظاهر و يعيشو مع بعض
بس المشكله انى بئيت اوقات بسمع صوته خافت جدا و اوقات مبسمعوش
لما بسمعه باجى اجرى اصطاد اللى بيقوله و ادونه لنفسى فى الفراغ الالكترونى ده و استنى صوت تانى منكم يجيلى يأكدلى وجوده ..وجودى ..ايوه الكتابه بالنسبالى احتياج
لكن المشكله انى بئالى مده مش بسمعه و ده مخوفنى جدا خايفه افقده وسط زحمة الاحداث و مشاغل الحياه و مش عارفه المفروض أعمل إيه
تفتكرو ايه الحجات اللى لما بنعملها تقربنا من نفسنا اكتر تخلينا نتصالح معاها و نستمتع بنعمة الاحساس ...هو فى حجات معينه اصلا
و الله مانا عارفه ..حد يعرف.. حد هنا ..حد سمعنى

Monday, February 11, 2008

تعاطفا مع ابو تريكه

لا توجد لدى كلمات .كلماتى لن تستطيع ان تقول ما قاله بتعبيرات وجهه اترون هذا العرق النافر فى جبهته تلك البسمه الهزيله و تلك النظره من عينيه على الحروف الخضراء ..اظنه ينظر لطفل قابع فى ظلام غزه يحاول ان يستذكر دروسه و صوت معدته الخاويه يعلو على صوت قعقعة اسنانه المتأثرة ببرودة هذا الشتاء القاسى .اظنه يمد يده الحانيه ليربت فقط على كتف ذلك الطفل

اظنه فقط يبدى انسانيته

**************

تحديث20/2/2008 : غيرت عنوان البوست من تعاطفا مع غزه الى تعاطفا مع ابو تريكه إعجابا منى بهذا الشخص الكريم بعد ان قرأت اليوم فى الدستور ظاهرة لجوء الفقراء و المحتاجين اليه بعد ان اغلقت فى وجوههم كافة الأبواب الأخرى اشفق على هذا الشخص الكريم من كم المأسى التى يراها كل يوم و اشعر بوجعه عندما يضع كل يوم رأسه على وسادته و هو يفكر فى كيفيه مساعدة هؤلاء المساكين

اكتب هذ البوست تعاطفا مع ابو تريكه و من مثله من من يختارون بكامل ارادتهم ان يحملو اعباء قد تكون اكبر من قدرتهم لكنهم لا يملكون الا ان يقبلوها

Friday, February 01, 2008

نورس وحيد


نورس وحيد فارد جناحه للهوى

راح طاف و شاف كل البحور

و جه سكن على بحرنا

صياد و غاوى يصطاد حكاوى العاشقين

اللى رماهم عشقهم على شطنا


مهو بحرنا مش بحر عادى

موجه بيحدف القصص على الشط دايما

من كتر جوفه ما اتملا

.

حكاوى جدعان شدهم راحو و مرجعوش من زمان

و صبايا رافض حلمهم يموت معاهم قبل الاوان

و حكاوى لسه بتتغزل على الشط كل يوم هنا

و النورس الابيض يلملم من هنا و من هنا

.

يغزل بمنقاره الجميل عقود امل

يلضم حروف متنتوره تتلم تتكون جمل

و يطيييييير يغنى غنوته

و يطييير بيرقص رقصته

و يطيير يعلمنا الحياه