أوقات بيكون حولينا ناس كتير و أحداث كتير المفروض إنها كبيره و مؤثره فى مجريات حياتنا (خطوبه ،جواز، شغل جديد و لا نجاح فى دراسه ) لكن تحس انها متهمكش ..مش حسسها ..كأنها بتحصل لحد تانى غيرك كأنك فى غيبوبه كامله .انقطاع تام عن العالم الخارجى و كأن ردود افعالك مبرمجه سابقا و كأن الحد اللى بيتصرف بره ده شخص و انت الحقيقى محبوس جواه.... انا اغلب الوقت بحس بكده
بحاول اخرج الحقيقى ده هنا يمكن يلاقى لنفسه سكة هروب او يمكن يتصالح مع الظاهر و يعيشو مع بعض
بس المشكله انى بئيت اوقات بسمع صوته خافت جدا و اوقات مبسمعوش
لما بسمعه باجى اجرى اصطاد اللى بيقوله و ادونه لنفسى فى الفراغ الالكترونى ده و استنى صوت تانى منكم يجيلى يأكدلى وجوده ..وجودى ..ايوه الكتابه بالنسبالى احتياج
لكن المشكله انى بئالى مده مش بسمعه و ده مخوفنى جدا خايفه افقده وسط زحمة الاحداث و مشاغل الحياه و مش عارفه المفروض أعمل إيه
تفتكرو ايه الحجات اللى لما بنعملها تقربنا من نفسنا اكتر تخلينا نتصالح معاها و نستمتع بنعمة الاحساس ...هو فى حجات معينه اصلا
و الله مانا عارفه ..حد يعرف.. حد هنا ..حد سمعنى
7 comments:
انا عارف
انا هنا
انا سمعتك
بجد بوست جميل
انا اول مرة ادخل
اللى شدنى للدخول انك اسكندرانية
الدم بيحن برضوا
تحياتى ليكى
ــــــــــــــــ
اول زيارة و اول تعليق
بس مش اخر زيارة و اخر تعليق
ان شاء الله
مدام لسه بتكتبي هنا يبقا لسه عايش وموجود.
جوه كل واحد مننا عايش حد بس الحد ده ساعات يبقي شاب عنده حيوية وساعات يبقي عجوز مش قادر حتى يتكلم فبيسكت لحد ما يموت ..
المهم انا كنت معدي بالصدفة قولت أقولك عيشي كأن بجد مفيش بكره
على فكرة صلاح جاهين بيعمل عمايل
مواطن مصرى نايم
عجبنى اسمك قوى على فكره
عايزين نصحى كلنا و نبطل نوم
بس انت مقلتليش متعرفش ايه اللى يقرب الواحد من نفسه بجد السؤال ده محيرنى جدا
تحياتى يا مواطن
Tarek
نصيحتك بجد جميله اوعدك ححاول انفذها
و عندك حق صلاح جاهين بينجدنى اوقات كتير
سعيده بتعليقك ارجو تكرر الزياره
ياه
ده تقريبا فات شهر
أنا ما زورتش اسكندريتك من شهر
كويس انك وصلتي لاحتياجك لنفسك
اللي حواليا بيقولوا اني معدتش موجود
وانا عايش (مفيش توصيف تاني لفعل الحياة) عايش في انتظار النهاية
أو يمكن تيجي بداية جديدة .. لأن القنوط حرام
i'm terribly tired of being sorry that i'm not existing Heba
كلامك مظبوط يا هبة بس كمان لازم تعرفي ان الجسد هو الحاجة الوحيدة اللي بتفصل بين هبة اللي مع الناس و هبة الحقيقية الموجودة جواكي يعني انتي ممكن تحلمي او تتخيلي انك طايرة فى الهوا بس ساعة التنفيذ بتصدمي بجسدك اللي هو حائل ما بينك وبين روحك الحرة المنطلقة مش معنى كده طبعا انك تنتحري لا سمح الله لأن الروح في الحالة دي ح تبقى محبوسة أكتر..مش ح أطول عليكي بس انتي طلبتي تعرفي ايه اللي ممكن يقرب الواحد من نفسه؟ و دي مش حاجة بسيطة بس يعني انا ممكن أقترح عليكي حاجة وتجربيها... لازم دايما تفكري ان انتي كانسانة حجمك ومقدرتك و قدراتك أكبر بكتير جدا من المستعملة الان و انك مجرد اسيرة عقلك لفترة من الزمن هي بحساب الخلود تبقى غمضة عين و بما انك خالدة كجميع البشر فان ما ينتظرنا في الجانب الاخر هو عالم جديد و قديم منذ خلقه الله ... يعني يبقى عندك امل انك حتى لو مش قادرة تحققي اللي انتي عايزاه او مش قادرة تخرجي هبة الموجودة بداخلك فان هناك حياة اخرى جديدة بالكامل تنتظرك بعد عمر طويل تحاولي فيها من جديد وانتي هبة الحقيقية اللي عندها قدرات تانية خالص .. بس ما تنسيش اهم حاجة علشان تبقي في مكان كويس في الوقت ده انك توصلي هناك و روحك طاهرة بارئة من الكفر و الخيانة فتكون روحك أكثر خفة و شفافية و تروحي لأبعد الحدود في الزمان و المكان ... هبة أرجو ان يكون كلامي نفعك ولو 5 %يبقى بداية egysadat1@yahoo.com
ريشة من جناح غراب يتيم وخلنجان وعين العفريت وخمسه جرام ملح اسود سائل
تطحنيهم كويس وترميهم فى بير مسعود الساعة ستة ونص الظهر
هتطلع لك نفسك على طول
بس وحياتك ابقى اعمليلى معاكى وصفة باسمى واذا طلعتك نفسى ابقى ابعتيهالى علشان مش لاقيها من زمااااااااااااااااان
اوقات الكأبة والحزن لما بيدخلوا حياتنا ويتوغلوا داخلها بيدمروا حاجات كتير كتير قوى ومش غريبة اللى انتى بتقولية لانة بيحصل لناس كتير اوى غيرك مش انتى بس الوحيدة لكن الفرق بيرجع من شخص لاخر ومن انسان لاخر وقدرة كل واحد على التغلب على هذة المحن ويعديها ولازم كل واحد يقرب من الدين اكتر ويستعين بربنا علشان يعدى المراحل دى كلها بسلام انا بقولك الكلام دة مع نفسى وبتمنى ان ربنا يعديها بخير وسلام على الكل
هذة هى الحياة وهذا هو العالم
Post a Comment