الصبح فى رمضان مختلف
روتين الحياه اليوميه بيتغير بدل الفطار السريع و الجرى علشان نلحق مواصلات رايقه لا فى فطار و لا فى زحمه
الشوارع فاضيه لغاية الساعه 10
هدوء جميل بيعم المكان
و انا رايحه على البحر استقبلتنى ريحته الممزوجه بنسايم رمضان
كان كائنه لسه نايم فى عباية السما الزرقه هادى ووديع ..و وحيد
مكنش فيه غيرنا أنا و البحر .. قاومت بصعوبه رغبتى بانى اقعد قدام ملكوته اراقبه فى هدوء
"فوقى يا هبه عندك شغل لازم تلحقيه "
ركبت و نزلت فى كليوبترا و ما ادراك ما كليوبترا
موطن الباقى من اليونانين .عماير قديمه .طراز معمارى مختلف لكل عماره
مش كل الناس بتبص لفوق علشان تتفرج على الزخرفه و الكرانيش المتزينه باوراق الشجر و تيجان العمارات
و زينة رمضان رابطه البيوت ببعض الوانها الزاهيه بتجدد لون الزمن المسبوغ على الجدران
الزينه الفضى بتضوى مع الشمس و ضوئها بيرقص تحت رجلى على نغم صوتها اللى بيعزفه الريح بالورق
وشوش الناس و زحمتهم دايما بتخلينا نبص مكان خطوتنا و نتحرم من الجمال اللى حوالينا
الشوارع اللى كانت طول الصيف زحمه و مليانه وشوش غريبه ..مفيهاش حد
غيرى انا و هى
ست الزمن ناحت تجاعيده فى ملامحها السمرا منغير ما يقدر يخفى جمالها
متلفحه فى السواد متعرفش من لبسها ده لبس صعيدى و لا لبس عواجيز بحرى
ماشيه بخطوات هاديه متشبسه فى الارض و عينها ادامها كأنها شايفه حاجه رايحالها محدش شايفها غيرها
روحها بتضفى على المكان طعم تانى
حتى الشمس كان شعاعها مابيلسعش مع انه منور السما باضاءه ساطعه و قويه
وصلت شغلى و انا حسه ان المدينه روتنى من هدوءها و اخدتنى فى حضن دافى جميل
15 comments:
كدة الشتا بدأ
فاضل شتواية جامدة تنضف الاسكندرية من 3 شهور صعبة
وترجعلنا جميلة هادئة دافئة
وساعتها حتلاقي الكل بيتفرج على الزخرفة و التيجان
مساء الخير علي إسكندريه وأهلها وكل سنة وانتم طيبيين وتتمتعوا باسكندرية في اجمل شهورها، شهر سيبتمبر من كل عام بهدؤها وجمال هدؤ البحر الخالي من الامواج في هذا الوقت كما لو كان يهدئ بعد تعب الصيف وامواجه
تحيات إسكندراني في بلاد الله الواسعة
ده اللي بيسموه نظرة متفائلة ومتفتحة للحياة
إزاي الواحد يقدر يشوف الحياة بنظرة مختلفة عن زميله الذي يرى نفس الاشياء بعين مختلفة
الاشياء ليست هي التي مختلفة ولكن الإختلاف في العين التي تنظر
أعشق العين الراصدة
حرام عليكي
ده أنا مشتاق لتمشيه ولو ساعه في شوارعها الوقت ده
بجد حسستيني أني فيها
رائع أحساسك بيها
ورائع أنك رجعتي تكتبي تاني
تحياتي
بترصدى يا هبة الصورة بدقة فعلا رمضان فى اسكندرية على البحر مختلف وفعلا الشوارع بنشوفها بشكل جديد بس فعلا بتحنسى اللى مجوش اسكندرية بشكل يجعلهم يتمنوا ييجوا يشوفوا اسكندرية بتاعتنا و الله برافو عليك 0000 واللى مشافش اسكندرية فى الشتا و لا فى رمضان خسران كتيييير جدا عنيكى جميلة يا هبة
منى اسكندرية
الله الله
ربنا يكرمك خدتينى معاكى
و فسحتينى
احلى الاوقات فى اسكندريه بداية الدراسة فبتكون اسكندرية للاسكندرنيين
رجعت لهم تانى
وشوقنا لها بيكون كبير
كانها غابت ورجعت لنا تانى
بارك الله فيكى
اسعدتينى فعلا
تحياتى
يا اخوااننا
انا عندى حفلة
اه و الله حفلة
لا و مش اي حفلة
انا هاغنى مع ايامنا الحلوة
المرة دى كعضو في الفرقة
عارفين هاغني ايه
انا هاغنى تلات سلامات
و هانغنى الليلة الكبيرة
و اغاني تانية
يا جماعة
انا مستنيكم كلكم تيجوا تنورونا في مسرح البالون بالعجوزة ان شاء الله يوم الجمعة الجاية الساعة 8و نص مساءا
ياه
فكرتيني بالبحر
تخيلي اسكندرانيه مشفتش البحر بقالي كتييير جدا
تحياتي
كل سنه وانتي طيبه
اسكندرانى قى العريه
يا مسهل يارب محتاجنها قوى الشتوايه
دى
اسكندرانى
و انت طيب و بالصحه و السلامه و تيجى تستمتع معانا بالشتا ان شاء الله
احمد شقير
تعليقك بيسعدنى لانة بحترمك جدا و بحترم مدونتك
شكرا على التعليق
منى اسكندريه
شكرا بجد يا منى كلامك هو الاجمل
عصمت
اى خدمه يا عصمت بس انتى قوليلى عايزه تروحى فين و انا اجيبهولك لغاية عندك
انا اللى عسيده لانى اسعدتك يارب دايما اقدر
على الالفى
مبروك على الحفله اتمنى انها تكون كانت حلوه
نهر الحب
مصدقه اوقات الدنيا بتاخدنا و بننسجن جوه نفسنا لا بنروح و لا بنيجى
و كمان الصيف و زحمته
بس خلاص لازم تهربى من مشاغلك و تروحيله اكيد وحشتيه زى ما هو وحشك
و انتى طيبه و متقطعيش الزياره
عزيزتى هبه، مدونتك جميلة و أفكارك رقيقة جداً و أنا سعيدة لتعليقك على بوست "ممرات العشاق" لهدى فائق لأننى كان بالفعل فى ذهنى صورة التناقض بين حالة العشق داخل الحدائق و التى تنقطع بمجرد الخروج من حدود الأسوار العالية إلى واقع فاقد للجمال. أهنئك على بحثك عن الجمال. أمنية النجار
جيت أبص فوق بدل مالاقي الحاجات اللي اتعودت عليها لقيت العيال السنة دي معلقين حاجة غريبة
صور هيفاء وهبي في إعلان بيبسي
مصدقتش
يا اخونا مش معقول، بأي منطق
بصيت تحت تاني
لحد لما قريت البوست بتاعك اللي رجعني لأيام زمان
ربنا مايحرمك من الجمال
الله يا هبة ..
كأني عندك .. أو بحلم أكون
بحب اسكندرية ..وبحب شلال النور اللي اسمه رمضان
تخيلي ..لا انتي ما تتخيليش لأنك عايشة الجو ده ..
تخيل يا حسن ..واحدة في جمال وسحر اسكندرية ..حاطة شلال نور على كتافها ..هاتبقى عاملة ازاي ؟
بالله ده صيام ده ولا جنة
ألحقنا الله بكم يا مَن في رحاب البحر والشاطئ
هبة يامصيتاااااااااناااا
هبه...بجد موضوعك رائع والاروع اسلوبك في الكتابة وبجد مهما اتكملنا علي جمال اسكندرية مش حنديها حقها والواحد الحمد الله بيفتخر انه اسكندراني
وتسلم ايدك علي التوبيك
العزيزه امنيه النجار(مدونة مصريات)
انا اسعد بتعليقك هنا و كلامك الجميل و بالنسبه لموضوعك فى مجلة امكنه ممرات العشق بجد نفسى نخرج جمال الحديقه و الروح اللى ساكنه ممراتها و نعيشها معانا فى شوارعنا اذا كان اللون الاخضر و نفس الزرع هو اللى بيهذب مشاعرنا و يخلينا اجمل ليه منملاش بيوتنا و شبابكنا بيه ليه منعش فى جنينه كبيره تملا قلوبنا بالجمال
اتمنى
باسم المليجى
يارب يا باسم ما يحرمنا من الجمال
اصل الجمال ده احتياج اساسى للحياه مش كماليات مرفهين زى ما كانو بيعلمونا
حسن امين
منور المدونه يا حسن بتعليقاتك الجميله
بحب خيالك
عمده
الله يكرمك يا عمده ده بس من زوقك بس مش انا اللى اسلوبى حلو اد مهى -اسكندريه- بتحلى الكلام دايما
Post a Comment