ريحان عايده

لو قاعد على قهوه فى المنشيه

و لقيت قدامك ست عجوزه بس صبيه

مشيتها خفيفه بس بضهرها محنيه

ملامح حاده زى شكل الفل الدبلان

ماسكه اعواد ورد و ريحان

شعر قصير اسود فى رمادى

ربطاه باستك ديل حصان

و تمر تديلك واحده

تبقى انت قابلت عايده

حتقفلك فى سكون و لا تنطق كلمه

بس حتشوف فى عنيها احزان و حكاوى قديمه

تسمع منها و لا تعرف تحكى بعديها

لو اديتها

عنيها تضحكلك

و تزود وردك و ريحانك

و ياسلاااام لو قلبها ارتحالك

تدعيلك و تديلك ورده مالورد المخصوص علشانك

تناولهالك ....زى اللى خايفه على رضيعها

و تودعها بنظره سريعه

و تبص فى عنيك من تانى و تسحب عينها و تبعد عنك و كأنها مكسوفه منك

ولو مدتهاش

حتاخد وردتها و تمشى فى هدوء و لا تتكلم

بس تحس ان احمالها ذات حملك و حتتألم